Mesûd Barzanî

Roja dûşema 02.12.2024 li Selaheddînê Serok Mesûd Barzanî pêşwaziya şandeke bilinda zanayên Ezherê kir ku ji rêzdar Dr Ebas Şuman Emîndarê Giştî yê Desteya Bilinda Zanayên Ezher û rêzdar Dr Selame Dawid Serokê Zanîngeha Ezher û rêzdar Wael Bexît Cîgirê Serokê Rêxistina Cîhanî ya Derçûyên Zanîngeha Ezher û rêzdar Ehmed Fewzî Birêveberê Karûbarê Derve li Zanîngeha Ezherê pêkhatibûn.

Li vê hevdîtinê de şanda mîhvan ji bilî derbirîna xweşhaliya xwe ya bi vê serdana wan ya Herêma Kurdistanê, pesnê aramî û geşbûn û pêşketina Herêma Kurdistanê kirin û bi girîngiyê ve behsa tebayî û pêkvejiyana netewe û olên cûda yên li Herêma Kurdistanê kir wekî mînakeke serkeftî ya li navçeyê.

Ji aliyê xwe ve Serok Barzanî spasiya şanda mîhvanan kir û ronahî xiste li ser peywendiyên dîrokî û dostaneya di navbera gelê Kurdistanê û gelê Misirê û hêvî jî xwest, ew peywendî zêdetir bêne pêşxistin bi taybetî li warê akademî û her wiha hemahengî û hevbeşa bi navendên olî û zanistiyên zanîngeha Ezherê re.

Metirsiyên serhildana terorê û bîr û hizra tundiyê û pêwîstiya hemahengiya hemû aliyek ya ji bo parastina aramiya navçeyê û her wiha guhertinên dawî û aloziyên li Rojhilata Navîn mijarên dinê vê hevdîtinê bûn.