مسعود بارزانی

ڕۆژی پێنجشەممە 4ی تەممووزی 2024 لە شاری بەغدا سەرۆک مەسعود بارزانی پێشوازی لە شاندێکی هاوبەشی باڵیۆزانی هەشت وڵاتی عەرەبی کرد کە پێکهاتبوو لە بەڕێز تارق عەبدوڵڵا ئەلفەرەج باڵیۆزی کوەیت لە عێراق و بەڕێز سوڵتان موبارەک ئەلکوبەیسی باڵیۆزی قەتەر لە عێراق و بەڕێز ئەحمەد سەمیر حلمی باڵیۆزی مسر لە عێراق و بەڕێز خالد ئەحمەد ئەلمەنسور باڵیۆزی بەحرێن لە عێراق و بەڕێز شێخ مەحموود ئەلخروسی باڵیۆزی سەڵتەنەتی عومان لە عێراق و بەڕێز زێد ئەبو حسان هەڵسووڕێنەری باڵیۆزخانەی ئەردەن لە عێراق و بەڕێز سەعید ئەلقەحتانی هەڵسووڕێنەری باڵیۆزخانەی سعودیە لە عێراق و بەڕێز محەمەد ساڵح ئەلتنیجی هەڵسووڕێنەری باڵیۆزخانەی ئیمارات لە عێراق.

لەو کۆبوونەوەیەدا سەرۆک بارزانی کورتەیەکی لەبارەی بارودۆخی سیاسیی عێراق و هۆکار و پاڵنەرەکانی سەردانەکەی بۆ بەغدا و دیدار و گفتوگۆ لەگەڵ لایەنە سیاسییەکان بۆ شاندی میوان خستەڕوو و هێمای بەوەدا کە کەشێکی ئەرێنی لە بارودۆخی سیاسیی عێراق و هەڵوێستەکانیان هاتۆتە ئاراوە و دەکرێ لەسەر بنەمای ئەو کەشە تازەیە بگەینە دەرئەنجامی باش بۆ چارەسەرکردنی کێشەکان و نەهێشتنی کۆسپ و تەنگژەکان کە ئەوە خۆیلەخۆیدا کاریگەریی لەسەر سەقامگیریی عێراق و ناوچەکە دەبێت. سەرۆک بارزانی لە درێژەی قسەکانیدا ڕۆشنایی خستەسەر بابەتی بوونی هێزی هاوپەیمانان لە عێراق و ڕایگەیاند پێویستە ئەم بابەتە لە چوارچێوەی ڕێککەوتن و تەوافوقێکی نیشتمانی و بە ڕەچاوکردنی بەرژەوەندییەکانی عێراق و ناوچەکە بنەمایەکی بۆ دابنرێت.

لە بەشێکی تری کۆبوونەوەکەدا باڵیۆزانی وڵاتانی عەرەبی هیوای ئەوەیان خواست سەردانی سەرۆک بارزانی بۆ بەغدا ببێتە مایەی خێر و سەقامگیری بۆ عێراق و هەروەها جەختیشیان لەوە کردەوە کە وڵاتەکانیان پشتیوانی تەواوی عێراق دەبن بۆ پتەوبوونی ئاسایش و سەقامگیری و خۆشگوزەرانی هاووڵاتیانی عێراق و چارەسەربوونی گرفتە سیاسییەکانی عێراق.